Лінкі ўнівэрсальнага доступу

logo-print

Ад АДС балятуецца 71 кандыдат у дэпутаты


Кастрычніцкая плошча ў Менску

Кастрычніцкая плошча ў Менску

Сёньня адбылося паседжаньне Прэзыдыюму Аб’яднаных дэмакратычных сілаў. На ім абмеркавалі пляны на выбарчы тыдзень і заклікалі прыйсьці на Кастрычніцкую плошчу.


У часе паседжаньня была агучаная інфармацыя, што ў суботу 27 верасьня а 13-й гадзіне адчыніцца інфармацыйны цэнтар Аб’яднаных дэмакратычных сілаў, дзе будзе акумулявацца ўся інфармацыя пра апазыцыйных кандыдатаў у дэпутаты і выпадкі парушэньня выбарчага заканадаўства. У дзень выбараў кожныя дзьве гадзіны, пачынаючы ад 9-й раніцы, будуць агучвацца папярэднія вынікі галасаваньня, заплянаваныя брыфінгі кандыдатаў у дэпутаты.

У 20:30 на Кастрычніцкай плошчы адбудзецца прэсавая канфэрэнцыя сустаршыняў АДС, якія акрэсьляць сваё стаўленьне да выбарчага працэсу. А 23-й у інфармацыйным цэнтры лідэры палітычных партый апошні раз за 28 верасьня сустрэнуцца з журналістамі.

Пра што так і ня здолелі дамовіцца сёньня прадстаўнікі палітычных партыяў — дык гэта пра фармат абвешчанага на 28 верасьня збору на Кастрычніцкай плошчы. Які, словамі старшыні АГП Анатоля Лябедзькі, даслаць “мэсыдж” народу — апазыцыянэры пакуль не прыдумалі. Думкі разышліся палярна — ад сумневу ў мэтазгоднасьці акцыі ўвогуле да лёзунгаў з патрабаваньнямі новых дэмакратычных выбараў і недапушчальнасьці фальсыфікацыі і прыцягненьня адміністратыўнага рэсурсу. Бальшыня ўсё ж схільныя дачакацца папярэдняга абвяшчэньня вынікаў на Кастрычніцкай плошчы, куды заклікаюць прыйсьці і неабыякавых да палітычных працэсаў людзей.

Сцэнар вечаровай акцыі 28 верасьня застаецца адкрытым да канца тыдня. Іншыя палітычныя сілы, якія не ўваходзяць у АДС і заклікаюць байкатаваць выбары, яшчэ раней абвясьцілі пра збор на Кастрычніцкай плошчы адразу пасьля закрыцьця выбарчых участкаў.

Сёньня кіраўнікі апазыцыйных партый падлічылі дакладную колькасьць удзельнікаў парлямэнцкіх выбараў, якія ўваходзяць у адзіны сьпіс Аб’яднаных дэмакратычных сілаў. У выніку атрымаўся 71 кандыдат: найбольшую прысутнасьць забясьпечылі АГП — 18 чалавек, БНФ — 16, КПБ — 14 і БСДГ (Грамада) — 10.

Вінцук Вячорка
Першы намесьнік старшыні Партыі БНФ Вінцук Вячорка акцэнтаваў увагу на тым, што камісіі на месцах парушаюць нават патрабаваньні Цэнтральнай выбарчай камісіі:

“Паддаўшыся ціску міжнароднай супольнасьці, якая, у сваю чаргу, паддалася ціску нашаму, было прынятае рашэньне пра “начныя скрыні” — каб іх заклейваць на ноч паперай і ставіць там подпісы старшыні і сябраў камісіі. Але ўчора ў Кобрыне адбылася нарада кіраўнікоў акруговай, участковай камісіі, вэртыкалі, міліцыі, на якую запрасілі таксама кандыдатаў. Там наш кандыдат Аляксандар Мех падняў гэтае пытаньне. Але ў выніку — ніякіх папераў, прыватнае рашэньне мясцовых органаў, што ўсё будзе як заўсёды. Прынцыпова важна, бо гэта “цана рашэньня” ЦВК. Цяпер важна прасачыць — ці адбываліся падобныя інструктыўныя нарады ў іншых акругах? Таму што прэцэдэнт ужо ёсьць”.

Сяргей Калякін
Іншай вялікай праблемай старшыня Партыі камуністаў Беларускай Сяргей Калякін называе датэрміновае галасаваньне, якое ажыцьцяўляецца ў прымусовым парадку. У прыватнасьці, ягоная акруга ўжо адрапартавала пра 8% выбарцаў, якія прагаласавалі да 28 верасьня:

“Трэба канстатаваць: такое самае будзе па інтэрнатах, дзе жывуць працоўныя. Відавочна, што ўлады гоняць на датэрміновае галасаваньне дзеля таго, каб фальсыфікаваць выбары. Вось я падлічыў: калі ў мяне сёньня 8% прайшлі праз участкі ўжо за адзін дзень, і калі яны ўрэшце гэтую лічбу давядуць да 25%, то ўжо потым усё астатняе галасаваньне спакойна можна рабіць “празрыстым”. Запісаць Палянскай (уладны канкурэнт С. Калякіна — РС) у плюс, і далей я ўжо ня выйграю ў яе гэты адрыў. Такім чынам яна атрымае большасьць галасоў, якія пасьля датэрміновага галасаваньня можна лічыць абсалютна празрыста. Гэта павінны мець на ўвазе ўсе дэмакратычныя кандыдаты.”

Ваша меркаваньне

Паказаць камэнтары

XS
SM
MD
LG