Лінкі ўнівэрсальнага доступу

Хто адкажа за зрыў хрысьціянскага фэстывалю ў Барысаве?


Улады Барысава забаранілі першы міжканфэсійны фэстываль хрысьціянскай музыкі. Плянавалася, што ён будзе праходзіць у цэнтральнай частцы гораду пад намётавым дахам. Фэстываль меўся распачацца а 17 гадзіне сёньня, 16 верасьня, і скончыцца ў нядзелю, 21 верасьня. Аднак перад самым пачаткам імпрэзы чыноўнікі барысаўскага райвыканкаму паведамілі прысутным, што духоўная музычная імпрэза адмененая.


На адкрыцьцё фэстывалю сабралася каля паўтары тысячы чалавек, але за 10 хвілін да адкрыцьця перад прысутнымі выступіла чыноўніца ідэалягічнага аддзелу і паведаміла, што фэстываль не адбудзецца, бо дазвол на яго правядзеньне “страціў юрыдычную моц”. Вось як гэтую фармулёўку пракамэнтаваў старшыня райвыканкаму Барысава Васіль Дылюк:

“Яны цалкам парушылі, нічога не далі: ні тое, што там правапарадак не парушаны, што там будуць прыбраныя пляцоўкі пасьля імпрэзы — там нічога няма. А мы, лапухі, усё гэта прапусьцілі, а гэта так не арганізоўваецца. І ўвогуле, я зараз заняты, папраўдзе кажу”.

Арганізатарамі фэстывалю духоўнай музыкі выступілі прадстаўнікі каталіцкай, праваслаўнай і пратэстанцкай канфэсіяў. Плянавалася, што ўдзел у ім прымуць каля сотні музыкаў і сьпевакоў з розных рэгіёнаў Беларусі. Адзін з арганізатараў паведаміў, што вэрсіяў забароны канцэрту ў іх некалькі:

“Тут шмат розных вэрсіяў: было тэлефанаваньне з аблвыканкаму — адмяніць, забараніць. Нібыта перасьцерагаліся таго, што некаторыя апазыцыйныя палітыкі выкарыстаюць гэта як трыбуну і выступяць тут. Такая вось нефармальная інфармацыя хадзіла”.

На адкрыцьцё фэстывалю прыйшлі ня толькі жыхары Барысава, але і людзі зь іншых гарадоў Беларусі. У тым ліку — лідэр аргкамітэту дзеля стварэньня партыі “Беларуская хрысьціянская дэмакратыя” Павал Севярынец. Вось як ён пракамэнтаваў здарэньне:

“Зараз некалькі сотняў чалавек разыходзяцца з гэтага вялізнага намёту, які быў пабудаваны адмыслова для фэсту. Тут вельмі шмат вернікаў розных пратэстанцкіх, каталіцкіх і праваслаўных цэркваў, жыхары Барысава. Натуральна, што людзі незадаволеныя, яны перапытваюць і ў арганізатараў, і ў міліцыі, што здарылася, але ніхто нічога ўцямнага ня можа сказаць. І сапраўды, мне падаецца, што гэтае рашэньне райвыканкаму — гэта атмасфэра страху, які пануе зараз у Беларусі і ў Барысаве, у прыватнасьці. Перад выбарамі ўлады баяцца ўсяго, нават уласнага ценю”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG