Лінкі ўнівэрсальнага доступу

ЗША разглядаюць магчымасьць скасаваць санкцыі супраць Беларусі, калі афіцыйны Менск зробіць крокі ў кірунку палітычных рэформаў. Рашэньне аб санкцыях будзе прымацца па выніках парлямэнцкіх выбараў 28 верасьня.

Старшыня Аб'яднанай грамадзянскай партыі Анатоль Лябедзька заявіў, што сфармаваць пазыцыю Вашынгтону і Менску перашкаджалі палітычныя вязьні. Пасьля іх вызваленьня гэтай перашкоды няма.

“Дэвід Мэркель, які прыехаў у Беларусь. Сфармуляваў інтарэс ЗША – гэта выбары, якія максымальна набліжаныя да стандартаў АБСЭ. Беларускі бок сфармуляваў свае прапановы: зьняцьцё эканамічных санкцый і, відаць, кропкавых санкцый адносна чыноўнікаў. Гэта парадак дня. Цяпер трэба глядзець, які будзе рух, пазытыў па кожнай пазыцыі, якія сфармуляваныя тым і іншым бокам.

Я думаю, калі б быў прагрэс па выбарчай кампаніі, то ЗША стрымалі б сваё слова, і гэта даказвае іх гісторыя і досьвед. Але ўзьнікае вялікі сумнеў, што ў астатні час будуць унесены нейкія карэктывы ў выбарчую кампанію. Для гэтага трэба дапоўніць склад участковых выбарчых камісій прадстаўнікамі АДС, якія туды былі прапанаваны, і, па-другое, даць мажлівасьць правесьці паўнакроўную інфармацыйную кампанію ў электронных мас-мэдыях, каб людзі рабілі сьвядомы выбар пад час выбарчай кампаніі. Ну і самае галоўнае – падлік галасоў”.

А.Лябедзька адзначыў, што цяпер пазыцыя Вашынгтона і Брусэля вельмі блізкая: далейшую пэрспэктыву разьвіцьця стасункаў зь Беларусьсю яны зьвязваюць з вынікамі выбарчай кампаніі.

Паказаць камэнтары

XS
SM
MD
LG