Лінкі ўнівэрсальнага доступу

Глуск: актывіст адмовіўся здаць сьліну ў ваенкамаце


У глускага сябра Беларускага Хэльсынскага камітэту Ігара Кірына сёньня ў ваенкамаце намагаліся ўзяць адбіткі пальцаў, а таксама — сьліну на генэтычны аналіз.

У ваенкамаце актывісту патлумачылі, што з такой просьбай да іх зьвярнуліся зь мясцовага аддзелу міліцыі.

Актывіст адмовіўся выконваць патрабаваньне супрацоўнікаў ваенкаманту, назваўшы яго незаконным:

“Мне не прад’явілі матываванай пастановы сьледчага, які вядзе крымінальную справу, у тым, што я падазраваны. Акрамя таго, у ваенкамаце ня маюць права праводзіць сьледчых дзеяньняў, тое павінна рабіцца ў міліцыі. Пра тое, што адбіткі бяруць у межах расьсьледаваньня абставінаў выбуху 4 ліпеня, мне не сказалі, але далі зразумець што я пра тое мушу ведаць і без тлумачэньняў”, зазначыў “Свабодзе” Ігар Кірын.

У ваенкамат Ігара Кірына выклікалі позвай, у якой было пазначана, каб ён з сабой узяў ваенны білет і аўтабіяграфію.

Паводле спадара Кірына, пракурор раёну, да якога пасьля ваенкамату ён прыйшоў на прыём, зьдзівіўся выкладзеным фактам і заявіў, што такога ня можа быць.

У міліцыі актывісту паведамілі, што ім загадалі з Магілёва браць адбіткі пальцаў:

“Мне сказалі, што адмовіцца ад працэдуры – гэта маё права. Аднак мяне, сказаў дзяжурны міліцыянт, могуць выклікаць у Магілёў, і там усё адно гэта зробяць”, паведаміў Ігар Кірын.

Паказаць камэнтары

XS
SM
MD
LG