Лінкі ўнівэрсальнага доступу

logo-print

Паводле Аляксандра Казуліна, які выйшаў на волю пасьля 2,5 гадоў зьняволеньня, за ім усталявана трывалае сачэньне спэцслужбаў. Нягледзячы на гэта, палітык не мяняе графік сваіх сустрэч.

Пра трывалае сачэньне спэцслужбаў Аляксандар Казулін паведаміў журналістам на прэсавай канфэрэнцыі 20 жніўня. Паводле палітыка, ягоныя тэлефоны праслухоўваюцца, а за аўтамабілем па горадзе езьдзіць да трох машын спэцслужбаў. Сёньня Аляксандар Казулін паведаміў, што сачэньне працягваецца.

“Працягваецца, хаця сёньня яны дзейнічаюць больш асьцярожна. Едуць ужо не адразу за маім аўтамабілем, а на некаторай адлегласьці. Больш хаваюцца ў завулках і праз рацыю перадаюць пра мае перасоўваньні. Тры аўтамабілі сачэньня даюць магчымасьць для манэўраў”.

З раніцы Аляксандар Казулін працягваў палітычныя кансультацыі і сустрэчы, сэрыю якіх пачаў з панядзелка. У сваёй кватэры палітык меў размову з былым палітвязьнем Андрэем Кімам, які выйшаў на волю ўчора, 20 жніўня. Спадар Казулін вітаў яго вызваленьне, а таксама вызваленьне Сяргея Парсюкевіча, назваўшы гэта “аднаўленьнем справядлівасьці”. Экс-кандыдат на прэзыдэнта мяркуе, што актывісты былі асуджаныя незаконна. Аляксандар Казулін паведаміў, што хутка зьявіцца сумесная з Андрэем Кімам і, магчыма, Сяргеем Парсюкевічам заява адносна непрыняцьця імі факту памілаваньня з боку Аляксандра Лукашэнкі:

“Мы будзем патрабаваць свайго безумоўнага і поўнага вызваленьня, а не памілаваньня, і, вядома, рэабілітацыі. Бяз гэтага тыя патрабаваньні, якія адносна нас заявілі ЗША і Эўразьвяз, ня трэба лічыць выкананымі”.

Аляксандар Казулін мяркуе, што сёньняшні прыезд у Беларусь высокапастаўленага прадстаўніка Дзярждэпартамэнту ЗША Дэвіда Мэркеля стаў магчымым пасьля такога кроку беларускіх уладаў, як вызваленьне з-за кратаў апошніх палітвязьняў. Вось што палітык думае пра тое, дзеля чаго спадар Мэркель будзе сустракацца з афіцыйнымі асобамі ў Беларусі:

“Натуральна, што размова будзе пра далейшы рух у адносінах. І натуральна, што будзе шукацца кампраміс у пазыцыях ЗША і Беларусі. Я на гэта спадзяюся”.

Аляксандар Казулін нагадаў, што акрамя вызваленьня палітвязьняў, застаюцца іншыя патрабаваньні ў рэчышчы дэмакратызацыі ў краіне, якіх чакаюць у беларускім грамадзтве. Гэта стварэньне ўмоў для сапраўды вольных дэмакратычных выбараў, спыненьне палітычных рэпрэсій супроць апазыцыі ды шэраг іншых.

Паказаць камэнтары

XS
SM
MD
LG