На гэтым кавалку ўсяго пяць будынкаў. Чатыры зь іх узьведзеныя на пачатку дваццатага стагодзьдзя й лічацца помнікамі архітэктуры. Тры — у аварыйным стане.
Два гады таму з ініцыятывай пераназваць частку вуліцы імя Лазарэнкі ў Віленскую выступіла тапанімічная камісія пры гарвыканкаме. Пакуль ініцыятыву разглядалі, на вуліцы Лазарэнкі пабудавалі мост, і дзьвесьце мэтраў некалі галоўнай вуліцы Магілёва апынулася пад мостам. У афіцыйным паведамленьні так і гаворыцца: “адцінак былой вуліцы Лазарэнкі пад пуцеправодам стаў вуліцай Віленскай”.
На Віленскай — чатыры помнікі архітэктуры. У іх месьцяцца царква эвангельскіх хрысьціян “Віфанія”, медвыцьвярэзьнік (у аварыйным стане), швейная майстэрня ды два незаселеныя будынкі, таксама ў аварыйным стане.
На ўсёй Віленскай толькі будынак царквы эвангельскіх хрысьціян “Віфанія” выглядае дагледжаным. Амаль разбураны, гэты будынак перадалі вернікам бясплатна на пачатку дзевяностых. Дагледжанай выглядае й палова будынку, дзе знаходзіцца швейная майстэрня. У другой палове дома — медвыцьвярэзьнік.
