Лінкі ўнівэрсальнага доступу

Міліцыя пагражае маладафронтаўцам затрыманьнем


Кіраўніцтва менскай міліцыі папярэдзіла сяброў незарэгістраванай арганізацыі “Малады фронт” пра тое, што іх затрымаюць, калі яны зьбяруцца на Кастрычніцкай плошчы для правядзеньня рэгістрацыйнага зьезду.

Маладафронтаўцы зьвярталіся ў розныя структуры па арэнду памяшканьня для правядзеньня зьезду, каб зарэгістраваць сваю арганізацыю. Пасьля шэрагу адмоваў яны зьвярнуліся ў Менгарвыканкам па дазвол правесьці зьезд 10 жніўня на Кастрычніцкай плошчы.

Сёньня Артура Фінькевіча і Зьмітра Дашкевіча выклікаў на размову ў ГУУС намесьнік кіраўніка менскай міліцыі Аляксандар Найдзенка. Ад іх імя на сустрэчу хадзіў Вадзім Ханяўка.

Зьміцер Дашкевіч паведаміў “Свабодзе”:

“Было заяўлена, што калі вы сунецеся на плошчу 10 жніўня для правядзеньня зьезду, то там мы вас і спынім. Гэта ўсё было сказана ў даволі грубай форме. Калі Вадзім спытаў, чаму дзяржава не дала магчымасьці сабрацца ў нейкіх іншых месцах, не паклапацілася, каб даць памяшканьне, як таго патрабуе заканадаўства, Найдзенка адказаў, што гэта ня іхныя справы. Сказаў: “Убачу там Дашкевіча і Фінькевіча, то адправім іх туды, дзе яны павінны знаходзіцца”.

Зьміцер Дашкевіч дадаў, што днямі сябры аргкамітэту пададуць скаргу ў пракуратуру на дзеяньні ўладаў. Ён заявіў, што “Малады фронт” дэманструе сваю гатоўнасьць дзейнічаць у рамках заканадаўства.
XS
SM
MD
LG