Лінкі ўнівэрсальнага доступу

Скапіявалі нямецкі камбайн – атрымаўся беларускі


Звыш 1100 збожжаўборачных камбайнаў накіравала на сёлетняе жніво ў вёску вытворчае аб’яднаньне “Гомсельмаш”. Цяпер камбайнавы парк Беларусі на 70 адсоткаў складаецца менавіта з гэтай тэхнікі. Аднак у гаспадарках мэханізатары хочуць працаваць на імпартнай тэхніцы.

Палеткі гаспадаркі “Ўсход” Гомельскага раёну даволі часта выкарыстоўваюцца “Гомсельмашам” для выпрабаваньняў збожжаўборачнай тэхнікі. Да таго ж тутэйшыя мэханізатары працуюць на гэтай тэхніцы і ведаюць яе, як той казаў, не па чутках.

“На пяцьдзясят працэнтаў яна недаробленая, я так лічу”, – прызнаецца саўгасны мэханізатар Мікалай.

Камбайнэр Сяргей таксама ведае сельмашаўскую тэхніку. Ён быў сьведкам выпрабаваньня камбайна “Палесьсе-14”:
Хіба ж можна за зіму нямецкі камбайн перарабіць на “Палесьсе-14”?..


“Я таксама працаваў на камбайне. Нямецкі камбайн толькі “фырк” — і пайшоў. Тут на другі сэзон прыходзіць “Палесьсе-14”, створаны на аснове нямецкага “Klaas’a”. Прыехалі зь ім усё гэтыя выпрабоўцы з досьледнай палявой станцыі. Яны дзень за ім хадзілі. Я на “Доне” чатыры бункеры намалаціў, а яны на гэтым “Палесьсі-14”, падобным да “Klaas’а”, — толькі два бункеры. Дык няхай канструктары не хімічаць, а робяць надзейна”.

Камбайнэр наагул перакананы: каб сканструяваць добрую тэхніку, патрэбны час. А “Палесьсе”, як кажуць, зьляпілі за зіму на аснове нямецкага ўзору:

“Хіба ж можна за зіму нямецкі камбайн перарабіць на “Палесьсе-14”? Ніколі ў жыцьці! Там канструктары гадамі зьбіралі, а ў нас — за зіму”.

Яшчэ адзін мэханізатар з багатым стажам працы лічыць, што “Гомсельмаш” для беларускага спажыўца робіць тэхніку значна горшую, чымся на экспарт у тую ж Расею:

“Яны ўсё скапіявалі — і атрымалася “Палесьсе”. Калі браць разьдзельны збожжавы камбайн, ён адзін сэзон пацягае свой прычапны бункер для абмалоту — і ўсё пасыпалася, рашоты пасыпаліся, увесь гэты прычэп. Недароблена, недакручана — цяп-ляп”.

Імпартовыя — яны й ёсьць імпартовыя. Калі сельмашаўцы свае камбайны пастаўляюць у Расею, яны робяць выдатна. А калі ў Беларусь, калі калгасьніку ідзе, то — з-пад малатка. Ніт не закручваецца, кувалдай шлёп — закруціўся ніт”.

Начальнік аддзелу мэханізацыі Гомельскага абласнога камітэту па сельскай гаспадарцы Ўладзімер Малашанка сьцьвярджае, што сельмашаўскія камбайны, нягледзячы на тэхнічныя характарыстыкі, пашыраюць сваю прысутнасьць у вёсцы:
Паломак шмат, але камбайн гэты працаваць будзе...


“У нас асноўны парк камбайнаў — “Гомсельмаш”, амаль 75 працэнтаў. “Ліда-1300” у нас — 55, “CF80” — 3, “Newholland” — 2, “Lexion” — 4 і болей за 400 “Донаў”.

У сэнсе эксплюатацыі няма чаго і параўноўваць: “Newholland” і “Lexion” якасьнейшыя. “Гомсельмаш” стварыў свой камбайн… Ён новы, малады. Такіх камбайнаў “Гомсельмашу”, каб іх гаспадаркі атрымалі і яны працавалі без паломак, няма. “Доны” сыходзяць, і асноўным камбайнам становіцца “Гомсельмаш”.

Магу толькі дадаць, што зь першымі камбайнамі, якія яны выпусьцілі, было вельмі шмат праблемаў. Іх цяпер грунтоўна дапрацавалі. Няма чаго й казаць: камбайн ужо працуе. Паломак пакуль шмат, гэта праўда. Але камбайн гэты працаваць будзе”.
XS
SM
MD
LG