Лінкі ўнівэрсальнага доступу

А.Сергіенка: выбілі дзьверы, надзелі кайданкі


Сябра перадвыбарчага штабу Анатоля Лябедзькі, сябра АГП Аляксандар Сергіенка зьвязвае сваё нядаўняе затрыманьне супрацоўнікамі КДБ у якасьці падазраванага па справе аб выбуху 4 ліпеня, зь ціскам уладаў на апазыцыю:

“Яны робяць такія палавіністыя меры: з аднаго боку пачынаюць уключаць асобных прадстаўнікоў апазыцыі ў выбарчыя камісіі. З другога боку пачынаюць перашкаджаць весьці падрыхтоўчую працу”.

А.Сергіенка апавёў пра некаторыя дэталі свайго затрыманьня супрацоўнікамі КДБ 10 ліпеня.

Ён паведаміў, што разам з братам знаходзіўся дома. Супрацоўнікі КДБ выбілі дзьверы і забеглі ў кватэру.

“Брата паклалі тварам на ложак, а мяне на падлогу. Прычым так ударылі тварам, што дагэтуль сіняк каля вока, нам надзелі кайданкі. Супрацоўнікі спэцслужбаў не прадставіліся. Яны зрабілі ператрус.Забралі нейкія старыя пляшкі з-пад бытавой хіміі, якія стаялі на бальконе. Таксама яны забралі некаторыя партыйныя дакумэнты. Мяне павезьлі ў “амэрыканку” і пасьля допыту пасадзілі ў камэру на адно месца. Нікуды не выводзілі – і гэта было самае цяжкае, бо не было зь кім нават пагаварыць”.

А.Сергіенку вызвалілі пад падпіску аб нявыезьдзе. Яму вярнулі сыстэмны блёк кампутара. Ён лічыць, што яму ўдалося даказаць сваё алібі.
XS
SM
MD
LG