Лінкі ўнівэрсальнага доступу

Сьпіс сталічных акруговых камісіяў трымаюць у сакрэце


Сёньня завяршаецца фармаваньне ўсіх 110 акруговых выбарчых камісіяў. Але дакладных сьпісаў сябраў камісіяў дагэтуль няма. Сакратар ЦВК Мікалай Лазавік сказаў “Свабодзе”, што ён таксама ня мае ўсёй інфармацыі.

Сьпісы сябраў акруговых камісіяў, зазначыў Мікалай Лазавік, павінны паступіць у Цэнтравыбаркам раніцай 15 ліпеня:

“Мы далі выканкамам сёньняшні дзень цалкам, каб яны займаліся фармаваньнем камісіяў. Заўтра а 10 гадзіне чакаем ад іх інфармацыю”.

Зь некаторых абласьцей зьвесткі пра фармаваньне камісіяў ужо прыйшлі. Паводле папярэдніх дадзеных, у акруговых камісіях будуць працаваць больш за 20 прадстаўнікоў апазыцыі. На папярэдніх парлямэнцкіх выбарах у склад акруговых камісіяў патрапіў толькі адзін апазыцыянэр.

Але гэтыя лічбы не павінны падманваць, сказаў “Свабодзе” сустаршыня Аб’яднаных дэмакратычных сілаў Анатоль Лябедзька:

“У нас настолькі нізкі ўзровень уцягненьня палітычных партыяў у выбарчы працэс, што зараз, якія б лічбы ні былі, можна гаварыць пра павялічэньне не ў працэнты, а ў разы. Таму, калі глядзець з пункту гледжаньня звычайнай арыфмэтыкі, дык прагрэс заўважны.

Але калі мы паглядзім на якасьць уключэньня — прыкладам, ад Аб’яднаных дэмакратычных сілаў і ад прапрэзыдэнцкіх структураў, дык тут ужо дынаміка будзе ў разы адваротная: для іх — прэфэрэнцыі, а для нас — працэс тармажэньня”.

Спадар Лябедзька кажа, што сёньня яшчэ немагчыма зрабіць поўны аналіз фармаваньня акруговых камісіяў, бо не хапае ўсіх зьвестак: напрыклад, колькі чалавек ад апазыцыі ўключылі ў гарадзкія акруговыя камісіі, а колькі — у сельскія:

“Ёсьць гарадзкія акругі, дзе за АДС заўжды галасавалі лепш, і сельскія, дзе нейкі прыярытэт ёсьць у прадстаўнікоў сьпісу Лукашэнкі. І я думаю, тут таксама будзе перакос на тыя акругі, дзе ў нас, можа, не такія моцныя кандыдаты і моцныя каманды. Я думаю, што ўлада гэта таксама ўлічвала”.

Каардынатар кампаніі “За свабодныя і справядлівыя выбары” Віктар Карняенка лічыць уключэньне ў склад шэрагу акруговых камісіяў прадстаўнікоў апазыцыі “вынікам распачатай кампаніі”:

“Улада павінна была рэагаваць нейкім чынам, бо не заўважаць ужо было нельга. Кампанія была пад увагай і міжнароднай супольнасьці, і, спадзяюся, часткі выбаршчыкаў Беларусі. Таму такія чыста касмэтычныя захады ўлада і выкарыстоўвае.

Але, на жаль, першыя высновы такія, што прадстаўнікі ўладаў зноў прыкрываюцца створанымі ці падкантрольнымі ім партыямі, каб такім чынам разбавіць гэты працэнт. Бо лідэрамі зьяўляюцца камуністы з партыі спадарыні Голубевай, з Аграрнай партыі. Гэта тыя партыі, якіх у жыцьці мы ніколі ня бачым. І якія ўлады выкарыстоўваюць падчас выбарчых кампаніяў”.

Найбольшая колькасьць выбарчых камісіяў у Менску — 20. Але пакуль ніякіх зьвестак са сталіцы няма. І вось што кажа пра гэта праваабаронца Ўладзімер Лабковіч:

“Адмоўлена катэгарычна ў Менску ў атрыманьні інфармацыі. І ў гарсавеце, і ў гарвыканкаме. Спасылаюцца на тое, што інфармацыя будзе надрукавана ў газэце “Минский курьер” у чацьвер. Як мне вядома, адмовілі ў тым, каб прысутнічаць на паседжаньні, прадстаўнікам грамадзкіх арганізацыяў, напрыклад, БХК.

А прадстаўнікам палітычных партыяў таксама зараз адмаўляюць у атрыманьні інфармацыі. Іх пасылаюць у газэту”.
XS
SM
MD
LG