Лінкі ўнівэрсальнага доступу

Яны баяцца розгаласу


Ці можна наогул неяк абараніць свае правы звычайным грамадзянам, калі міліцыя перавышае свае паўнамоцтвы й незаконна абмяжоўвае правы?

Наконт гэтага разважаюць грамадзкія актывісты з Гомельскай вобласьці.

Прадпрымальнік з Рэчыцы Леанід Невар мае свой досьвед зусім ня дзелавых стасункаў зь мясцовай міліцыяй і, у прыватнасьці, з супрацоўнікамі ДАІ.

Падчас выбарчай кампаніі 2004 году, калі прадпрымальнік вырашыў балятавацца кандыдатам у дэпутаты Палаты прадстаўнікоў, яго розным чынам спрабавалі выштурхнуць з кампаніі.

Міліцыя ўчыняла ператрусы, калі дома ў прадпрымальніка зьбіраліся чальцы каманды альбо незалежныя кансультанты зь Менску.

Аднойчы былы начальнік мясцовай ДАІ Аляксандар Фядак разам з падначаленымі дзяржаўтаінспэктарамі арганізаваў пагоню за аўтамашынай прадпрымальніка. Невара вінавацілі ў тым, што ён не падпарадкоўваўся інспэктарам і наагул хацеў уцячы ад іх.

Прадпрымальніка праз суд пазбавілі на тры гады пасьведчаньня на права кіраваньня аўтамашынай.

Леанід Невар не маўчаў, але ў суд не зьвяртаўся:

“Я не пайшоў у суд, бо ён залежны ад мясцовай улады. Я спрабаваў абараняцца з дапамогай пракуратуры. За тры з паловай гады я прайшоў усе ступені — ад нізавога зьвяна да Генэральнай пракуратуры. Але, як правіла, на ўсіх этапах атрымліваў адпіскі. Уражаньне такое, што пракуратура давала адказы, нібы пад капірку, каб я толькі адчапіўся. Што далей рабіць? Патрэбны розгалас! Розгалас і яшчэ раз розгалас. Яны баяцца розгаласу. Калі мы ня будзем маўчаць, будзем выступаць, — гэта можа хоць нешта зьмяніць”.

Сябра АГП, чарнобыльскі ліквідатар з Калінкавічаў Васіль Сіліверст таксама ня раз зазнаў перасьлед з боку міліцыі й спэцслужбаў. Міліцыянты затрымлівалі яго бяз дай прычыны, калі ён зьбіраўся выправіцца ў Менск на выбары альбо на той жа “Чарнобыльскі шлях” :

“Вартавала мяне міліцыя ў пад’езьдзе, здымала зь цягніка. Я зьвяртаюся напачатку ў аддзел міліцыі, а потым да пракурора. Але яны так усё завалакіцяць, як быццам нічога й не было. У суд падаваць на іх — карысьці ніякай. І суд, і пракуратура, і міліцыя — усё гэта адна сыстэма, скіраваная супраць чалавека. Яны найперш ратуюць сваю скуру. Каб нешта давесьці, патрэбныя пераканаўчыя факты — відэаздымкі, аўдыёзапіс, сьведкі. Але ж калі ты сам-насам зь міліцыянтамі, нічога давесьці немагчыма. Вераць больш міліцыянтам. Змагацца трэба разам, як удзельнікі “жывога шчыта”. Выкручвацца тады міліцыі вельмі цяжка, калі шмат людзей падае на іх скаргі”.
XS
SM
MD
LG