14.00. Суд пастанавіў выслухаць іхныя паказаньні пасьля таго, як выступяць пацярпелыя.
Выступілі Юры Башкевіч, Марыя Вярбіцкая і Алена Калпакова. Яны патлумачылі, што 2-сакавіка на шашы “Мікашэвічы-Менск” на ўезьдзе ў горад супрацоўнікі ДАІ спынілі іхныя аўто, выставілі машыны ў шэраг, каб спыніць нецьвярозага кіроўцу. Пры гэтым мэту сваіх дзеяньняў не патлумачылі, самі не назваліся, выйсьці з машынаў забаранілі. Усе пацярпелыя заявілі абвінавачаным грамадзянскі пазоў аб кампэнсацыі стратаў здароўя і матэрыяльных стратаў.
У перапынку адвакат абвінавачаных Васіль Тулякоў ад камэнтароў адмовіўся. Ён толькі заявіў, што сваю пазыцыю агалосіць у судзе.
Абвінавачаныя таксама размаўляць з прэсай адмовіліся - паабяцалі выказацца пасьля рашэньня суду.
Разгляд справы адбываецца ў перапоўненай залі. Бальшыня месцаў занятая людзьмі ў цывільным, супрацоўнікамі ДАІ і іхнымі сваякамі.
10.00. У судзе Менскага раёну і гораду Заслаўя пачынаецца працэс па справе “жывога шчыта”.Невядомыя людзі ў цывільным занялі ўсе месцы ў залі судовых паседжаньняў.
Не пускаюць журналістаў, якія зьбіраліся асьвятляць хаду працэса.
Адкават Вера Страмкоўская запатрабавала, каб ў залю дапусьцілі прадстаўнікоў мэдыяў.
Судзьдзя - Ірына Майко. Прадстаўнік абвінавачваньня – Мікалай Дубянок. Абвінавачаныя супрацоўнікі ДАІ Генадзь Дарагакупец і Аляксей Ліхтаровіч.
Ці прызнаюць міліцыянтаў вінаватымі ў “жывым шчыце”?
Між тым некаторыя з пацярпелых мяркуюць, што вінаватаму ў інцыдэнце кіроўцу далі магчымасьць схавацца, каб вывесьці з-пад абвінавачаньня больш высокапастаўленых супрацоўнікаў ДАІ.
