Асьвячэньне адбылося ў Дзень нябеснага заступніка Магілёва – сьвятога Антонія. На сьвятую ўрачыстасьць прыйшлі каля сотні вернікаў, а таксама прыехалі каталіцкія сьвятары з суседніх з Магілёвам прыходаў – са Шклова, Чувусаў, Мсьціслава ды Крычава.
“Ягонае жыцьцё зьяўляецца прыкладам для тых хто шукае Хрыста, хто хоча яму служыць. Тады, калі цяжка, тады, калі шлях не зразумелы для нас альбо поўны небясьпекі, мы шукаем сабе заступніка. Дык вось сьвяты Антоні зьяўляецца вялікім апекуном і патронам. Сьвяты Антоні зь неба спрыяе тым, хто просіць ягонай дапамогі ў тым, каб атрымаць ласку ад Бога”.
Пасьля сьвятой літургіі ксёндз біскуп Антоні Дзям’янка асьвяціў пляц, дзе неўзабаве пачнуць закладаць падмурак касьцёлу сьвятога Антонія, ды звон будучага храму.
Па пабудове касьцёлу ён стане другой каталіцкай сьвятыняй у Магілёве. Пакуль жа на месцы будаўніцтва дзейнічае часовая капліца рыма-каталіцкага прыходу Сьвятога Антонія.
Будуецца касьцёл у Магілёўскім Задняпроўі блізу сьвятога возера.
Сьвяты Антоні стаў апекуном Магілёва пры канцы XVI стагодзьдзя. Ягоны цудатворны абраз прынесьлі ў Магілёў францішканскія прапаведнікі. Абраз зьнік за часам Другой усясьветнай вайны.
