Факт нібыта незаконнага ўвозу аўтакэмпэраў “Фіят” і “Вольва” быў выяўлены супрацоўнікамі Менскай рэгіянальнай мытні. Як патлумачылі ў прэсавай службе камітэту, у адпаведнасьці зь дзейным заканадаўствам тавары, якія ўвозяцца на мытную тэрыторыю краіны дзеля экспанаваньня на выставах, падпадаюць пад працэдуру абавязковага мытнага афармленьня. Аднак датычна літоўскіх фургонаў заявы пра адпаведны рэжым у беларускую мытню не паступала.
Цяпер, як кажа кіраўнік прэсавай службы Дзяржаўнага мытнага камітэту Ўладзімер Пехцераў, ідзе разбор — з чыёй віны не адбылося мытнае афармленьне транспартных сродкаў зь літоўскай прапіскай. Як надоўга можа зацягнуцца справа — прадстаўнік ведамства дакладна ня ведае:
“Я магу сказаць, што разбор будзе праводзіцца столькі, колькі будзе патрэбна — дзеля таго, каб высьветліць усе акалічнасьці справы. Калі запатрабуецца, будуць апытаныя ўсе супрацоўнікі мытняў, зьнятыя ўсе матэрыялы відэакантролю. Адміністратыўнае расьсьледаваньне праводзіцца ўсебакова і аб’ектыўна — з тым, каб матэрыялы справы былі максымальна поўнымі”.
У сваю чаргу, літоўскі бок запэўнівае, што аўтакэмпэры былі ўвезеныя ў Беларусь па ўсіх правілах.