Лінкі ўнівэрсальнага доступу

logo-print

Сёньня судзьдзя Пухавіцкага райсуду Святлана Акуліч адхіліла хадайніцтва Сяргея Абразоўскага перанесьці разгляд адміністрацыйнай справы на іншы дзень.


Заяўнік скардзіўся на дрэнны стан свайго здароўя, спасылаўся на пісьмовае мэдыцынскае накіраваньне ў Менскі абласны шпіталь у Бараўлянах. Аднак, як удакладнілі ў канцылярыі Пухавіцкага раённага суду, просьба Сяргея Абразоўскага адхіленая. Яго вінавацяць у арганізацыі несанкцыянаванага мітынгу жыхароў у пасёлку Сьвіслач Пухавіцкага раёна 29 сакавіка.


Ад 25 красавіка да сёньня Сяргей Абразоўскі знаходзіўся на стацыянарным лячэньні ў шпіталі ў пасёлку Сьвіслач зь дыягназам “перадынфарктны стан”. Хвароба выявілася пасьля гвалтоўнага затрыманьня спадара Абразоўскага міліцыянтамі Пухавіцкага РАУС перад яго паездкай у Менск на “Чарнобыльскі шлях – 2008”.

На 12 траўня спадар Абразоўскі мае накіраваньне на лячэньне ў Менскім абласным шпіталі ў Бараўлянах.

Сяргею Абразоўскаму — 49 гадоў. Ён скончыў Менскі палітэхнікум, а пасьля — Беларускі політэхнічны інстытут, атрымаў спэцыяльнасьць інжынэра. Працаваў на прадпрыемствах у Пухавіцкім раёне і ў Менску. Жанаты, мае двух сыноў. Сябра Партыі камуністаў беларускай. Цяпер узначальвае ініцыятыўную групу, якая выступае супраць будаўніцтва ў пасёлку Дружным Пухавіцкага раёну хімічнага заводу “Август-Бел”.

“Август” — прыватная расейская кампанія. Офіс знаходзіцца ў Маскве. Вытворчасьць — у пасёлку Вурнары, што ў Чувашыі. У 1960-я там выраблялі дуст (ДДТ) для ўсяго СССР. Цяпер расейскі бок заяўляе, што на заводзе ў Беларусі будзе вырабляцца 18 відаў пэстыцыдаў — хімічных сродкаў для зьнішчэньня пустазельля і шкоднікаў на сельскагаспадарчых пасевах.

Паводле заявы арганізацыйнага камітэту грамадзкасьці ў пасёлку Дружны, пры рэалізацыі праекту ЗАТ “Август-Бел” парушаюцца асноўныя патрабаваньні міжнароднай Орхускай Канвэнцыі, далучэньне да якой Беларусь дэкляравала 14 сьнежня 1999 году. У прыватнасьці, Канвэнцыя патрабуе:

1. Доступу насельніцтва да экалягічнай інфармацыі;

2. Удзелу грамадзкасьці ў працэсе прыняцьця экалягічна значных рашэньняў;

3. Доступу да правасудзьдзя ў пытаньнях, якія тычацца навакольнага асяродзьдзя.


Падрабязнасьці – пазьней у эфіры і на сайце Радыё Свабода.

XS
SM
MD
LG