Лінкі ўнівэрсальнага доступу

logo-print

Як адзначалі 1 траўня ў рэгіёнах <img src="/img/icon-photogallary.gif" border=0 />


Мясцовыя ўлады ў рэгіёнах не дазволілі ніводнай першатравеньскай імпрэзы, заяўкі на якія падавалі апазыцыйныя партыі і арганізацыі. І ўсё ж несанкцыянаваныя акцыі адбыліся.


1 траўня ў пасёлку Дружны Пухавіцкага раёну плянаваўся чарговы мітынг супраць будаўніцтва хімічнага заводу расейскай прыватнай фірмы “Август”.

Аднак ужо раніцай “Свабода” атрымала паведамленьне, што міліцыянты блякавалі мясцовы шпіталь. Перадусім пільнавалі Сяргея Абразоўскага — нефармальнага лідэра. Ён цяпер лечыцца пасьля сутычкі зь міліцыянтамі 26 красавіка.

Абразоўскі: “На сёньня ўжо другая актывістка — Тацяна Расінец — трапіла ў гэты шпіталь. Міліцыя аблажыла будынак, нягледзячы на тое, што мы знаходзіліся пад кропельніцамі. Усе яны ў цывільным адзеньні. Тры экіпажы — ля шпіталя, а яшчэ адзін — ля майго дому”.

Шпіталізацыя спатрэбілася Тацяне Расінец пасьля так званай прафіляктычнай гутаркі міліцыянтаў. А як пачуваецца зараз спадарыня Тацяна?

“Ужо ў прынцыпе нармальна. А ўвогуле, самі разумееце, што ня вельмі прыемна, калі прыяжджаюць на працу і наяжджаюць”.

Раніцай у Магілёве ў часе акцыі на плошчы імя Леніна быў затрыманы грамадзкі актывіст Мікалай Расюк:

“Ім быў дадзены загад мяне ізаляваць ад сёньняшняй акцыі. І гэта ўжо ў другі раз. Першы раз забралі 26 красавіка. Зрабіў гэта палкоўнік Алёнушкін — галоўны міліцыянт вобласьці”.

Карэспандэнт: “А якія былі вашы пляны на ўдзел у дэманстрацыі ў Магілёве?”

“Узяў сьцяг БСДП (Грамада), які афіцыйна зарэгістраваны. Меў на мэце прадэманстраваць уладзе, што час патрабуе зьвярнуць увагу на галіну будаўніцтва. Вельмі нездаровая абстаноўка, дрэнная якасьць і ўсё іншае. А Лукашэнка зьбіраецца будаваць атамную электрастанцыю”.

У Берасьці адбылося найбольш масавае ў рэгіёнах вулічнае шэсьце. Яго маршрут пачаўся на плошчы Свабоды, а завяршыўся ў гарадзкім парку імя 1 траўня. Актывіст Ігар Маслоўскі:

“Раздаём віншаваньні зь Першамаем, улёткі, паштоўкі. Сустрэлі тут начальніка УУС Ленінскага раёну Берасьця, яго павіншавалі. У парку цяпер вельмі шмат міліцыянтаў. Вось яны і наперадзе калёны, і збоку. Па рацыі нешта перадаюць (сьмяецца)”.

У 14.40 удзельнікі шэсьця ў Берасьці разгарнулі 4-мэтровы сьцяг БСДП (Грамада). Міліцыянты кінуліся да яго. Але пасьля адпаведнага тлумачэньня міліцыянты больш не заміналі ўдзельнікам дэманстрацыі.

У Наваполацку не дазволілі пікет на 1 траўня. Заяўку ў гарвыканкам падавалі прадстаўнікі БСДП (Грамада). У пісьмовай адмове за подпісам старшыні Наваполацкага гарвыканкаму Натальлі Качанавай ім паведамілі, што для правядзеньня пікету 1 траўня ў горадзе няма месца, бо ва ўсіх парках і на ўсіх плошчах будуць праводзіцца масавыя сьвяткаваньні. Актывісты плянавалі зьбіраць подпісы супраць адмены льготаў, супраць кантрактнай сыстэмы і за спрашчэньне прадпрымальніцкай дзейнасьці.

У Віцебску каля 30 прадстаўнікоў абедзьвюх камуністычных партыяў сабраліся аб 11-й раніцы на плошчы Леніна ў Віцебску, каб ускласьці кветкі да помніку Леніна. Міліцыянты не прад’яўлялі да іх прэтэнзіяў, хаця віцебскія камуністы — пераважна пэнсійнага ўзросту — сабраліся тут несанкцыянавана, таму што ў афіцыйным дазволе на акцыю ім адмовіў гарвыканкам.
XS
SM
MD
LG