Лінкі ўнівэрсальнага доступу

На Бангалоры адбылася маёўка <img src="/img/icon-photogallary.gif" border=0 /> <img src="/img/icon-video.gif" border=0 />


У Менску ў парку Дружбы народаў (плошча Бангалор) прайшло сьвяткаваньне Дня салідарнасьці працоўных, якое арганізавалі Партыя камуністаў Беларуская і актывісты незалежных прафсаюзаў.


Маёўка на Бангалоры праходзіла пад лёзунгамі: “Працоўнаму — прыстойны заробак!”, “Так — працы, не — зьбядненьню народа!” Маёўку пачаў лідэр кампартыі Сяргей Калякін. Ён заклікаў працоўных “расплюшчыць вочы і параўнаць сваё жыцьцё з тым прыгожым жыцьцём, якое паказвае беларускае тэлебачаньне”. Ягоную прамову слухалі каля 200 чалавек, потым людзей стала больш. Прыйшла на Бангалор і Галіна Мікалаеўна, якой за 70 гадоў. Жанчына згадала, што ўпершыню на такую маёўку пасьля вайны яе прывёў тата-партызан.

“Таму я зь вялікім задавальненьнем хаджу на сьвята 1-га траўня”.

Карэспандэнт: “А ці ёсьць патрэба ў беларускіх працоўных змагацца за свае правы?”

“У мяне пэнсія 400 тысяч рублёў, можа, і мала, а ў некаторых і гэтага няма. А ці трэба змагацца — ня ведаю. У мяне заўсёды быў рост, ніхто мяне не прыціскаў”.

Пасьля кароткіх палітычных прамоў людзі слухалі музыкаў, гулялі ў шахматы на турніры, падымалі гіры і перацягвалі канат. Прэзэнтацыю сваёй газэты праводзілі журналісты партыйнага выданьня “Товарищ”, якое настойліва імкнецца пашырыць кола чытачоў. Сярод іншых падарунак за супрацоўніцтва з газэтай атрымала Тацяна Бублікава з Гомеля. Месяц таму суд аштрафаваў дзяўчыну на паўмільёна рублёў за ўдзел у акцыі, прымеркаванай да 90-годзьдзя БНР. Пытаюся ў пазаштатнай журналісткі “Товарища” пра яе думку адносна сацыяльнай актыўнасьці працоўных у Беларусі.

“Мая думка, што беларускія людзі не імкнуцца актыўна абараняць свае правы. Частку ўсё задавальняе, а тая частка, каго не задавальняе, сядзіць па кухнях і выказваецца толькі паміж сабой. Што да адкрытай барацьбы... Пакуль кавалак хлеба ёсьць, людзі ня хочуць яго губляць”.

Чырвоныя з жоўтымі сярпамі сьцягі камуністаў суседнічалі сёньня на Бангалоры зь бел-чырвона-белымі з выявай ружы сьцягамі сацыял-дэмакратаў. Бачу сярод палітыкаў левага напрамку і Юрыя Хадыку, вядомага дзеяча партыі БНФ. Спадар Хадыка пацьвердзіў, што прыйшоў сёньня на Бангалор невыпадкова:

“Для мяне 1-га траўня — традыцыйнае сьвята. Яно па-за палітычнымі колерамі, бо гэта сьвята працоўных. Няма ніводнай палітычнай сілы, якая б магла ігнараваць працоўнага чалавека. А таму я тут, хоць кіраўніцтва БНФ заняло пазыцыю маўклівага ўстрыманьня. Лічу гэта няправільным”.

Удзельнікаў маёўкі апякалі некалькі міліцыянтаў, якія прыехалі на аўтамабілі ДАІ. Маёўка прайшла без інцыдэнтаў.
















Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG