Лінкі ўнівэрсальнага доступу

logo-print

Анонс падзеяў тыдня. Працэс 14-ці, суд над Парсюкевічам, дэбаты аб кошце шэнгенскіх віз, Дзень Зямлі, дударскі фэст, музэй у Хойніках, угодкі Чарнобыля.

У панядзелак працягнецца “працэс 14-ці”. На мінулым тыдні ў судзе Цэнтральнага раёну Менску судзілі ўдзельнікаў акцыі пратэсту прадпрымальнікаў 10 студзеня. Маладых людзей вінавацяць ва ўдзеле ў масавых беспарадках, якія нібыта мелі месца пад час акцыі.
Адзін з абвінавачаных Міхась Пашкевіч, сябра Аб’яднанай Грамадзянскай партыі, кажа, што прагназаваць, якім будзе прысуд, цяжка:
“Цікава пачуць, што будзе казаць пракурор, што ён запатрабуе ў якасьці пакараньня. Цікава, што будзе казаць судзьдзя, бо цягам разгляду справы яна некалькі разоў ужо мяняла сваё маральнае стаўленьне да абвінавачаных. У пятніцу нас зьдзівілі БРСМаўцы сваім візытам на судовае паседжаньне. Паглядзім, хто да нас завітае ў панядзелак”.
***
У рамках чарговай сэсіі Эўрапарлямэнту ў Страсбуры, у Францыі, 21 красавіка пройдуць дэбаты аб умовах атрыманьня шэнгенскіх візаў грамадзянамі Беларусі і Украіны.
У часе дэбатаў заплянаваная заява старшыні Камісіі Эўразьвязу і выступы дэпутатаў. Дэбаты пройдуць паводле прапановы дэпутатаў, якія ініцыявалі збор подпісаў за зьніжэньне памеру консульскага збору за шэнгенскія візы для беларусаў.
Вольга Стужынская, кіраўніца недзяржаўнай арганізацыі "Офіс за дэмакратычную Беларусь" у Брусэлі, адзначае, што збор подпісаў досыць марудны:
“Вельмі пазытыўна, што дэбаты адбудуцца, але ня варта чакаць вынікаў адразу. Праблемай ёсьць перакананьне шмат каго з парлямэнтароў, што пакуль Беларусь не пачне крокі па дэмакратызацыі, да таго моманту ня варта наагул размаўляць з кіраўніцтвам краіны ні на якія тэмы, ўключаючы візы”.
***
22 красавіка ў сьвеце адзначаюць Дзень Зямлі. Да гэтай даты Амэрыканская амбасада прымеркавала прэзэнтацыю вынікаў фотаконкурсу, прысьвечанага гэтай даце. Усясьветная акцыя Дзень Зямлі пачалася ў ЗША у 1970 годзе. У гэты дзень традыцыйна ўсе добраахвотнікі прымаюць удзел у азеляненьні сваіх дамоў, двароў і вуліц. На мэце конкурсу – паказаць з дапамогай творчай фатаграфіі прыгажосьць і крохкасьць навакольнай прыроды. Прэзэнтацыя адбудзецца ў кінатэатры “Перамога” ў Менску а 16-й гадзіне.
***
У аўторак у Маскоўскім раённым судзе Менску пачнецца суд над актывістам прадпрымальніцкага руху Сяргеем Парсюкевічам. Яго вінавацяць у зьбіцьці ахоўніка турмы на Акрэсьціна, калі ён адбываў там адміністрацыйны арышт за ўдзел у мітынгу 10 студзеня. Актывіста трымаюць у менскім сьледчым ізалятары з 4 сакавіка. Фізычны яго стан вельмі цяжкі, распавядае адвакатка Вера Страмкоўская:
“Яму вельмі дрэнна там фізычна, – там няма паветра, яму няма чым дыхаць: у яго астма.”

***

24 сакавіка ў Хойніках адкрыюць Музэй “Трагедыя Чарнобыля”. Запрошаны на ўрачыстасьць публіцыст – эколяг Васіль Якавенка – кажа, што музэй не спыняе зьбіраць экспанаты:
“Тут я ўжо кінуў кліч сярод чарнобыльскіх нашых дзеячаў, і сам назьбіраў нямала. Знайшоў нават кампазыцыю “Сьлед чорнага ветру”, – добрая вельмі кампазыцыя, гучала год 10 таму ў эфіры. І кнігі – у іх зусім не аказалася кніг, хаця іх выдавалася багата на чарнобыльскую тэму”.
***
24, 25 і 26 сакавіка ў Менску пройдзе Дударскі фэст, які ўжо некалькі год запар зьбірае аматараў этнамузыкі ў Менску. Колькасьць удзельнікаў пастаянна расьце, кажа адзін з арганізатараў і выступоўцаў фэсту – лідэр гурту “Стары Ольса” Зьміцер Сасноўскі:
“Упершыню будуць выступаць беларускія дзеці, якія вучацца граць на дудзе. Утварыліся новыя музычныя гурты. Унікальны ўдзельнік у нас ёсьць – дудар з Новай Зэляндыі. Апроч геаграфіі, пашырылася і працягласьць фэсту: тры дні, тры канцэрты, і потым навуковая канфэрэнцыя”.
***
26 красавіка, у суботу, Беларусь адзначыць трагічную дату: споўніцца 22 гады выбуху на Чарнобыльскай АЭС. Чым ёсьць гэты дзень для Беларусі, разважае палітык Павал Севярынец:
“Для мяне Чарнобыль – гэта знак. Знак духовае бяды, духовае радыяцыі, якая паражае Беларусь хлусьні, страху, падману. Гэта ёсьць духовы Чарнобыль. Тое, што зараз савецкая хлусьня нагрувашчваецца на хлусьню сёньняшняга рэжыму, таксама выкліча выбух. Мы не павінны забывацца на тое, што разбурэньне маралі, як і радыяцыя – рэчы катастрафічныя”.
XS
SM
MD
LG