Некалькі беларусаў, якія жывуць у Варшаве, прыйшлі да будынку пасольства Беларусі з нацыянальнымі бел-чырвона-белымі сьцягамі і партрэтамі зьніклых палітыкаў, палітвязьняў. Да іх далучыліся таксама двое палякаў з намаляваным на картоне цяперашнім афіцыйным сьцягам Беларусі, на якім было напісана “Беларусь – так, Лукашэнка – не”.
Між тым сябры грамадзкай арганізацыі “Вольная Беларусь” гэтым разам вырашылі адзначыць Дзень Салідарнасьці нетрадыцыйна – яны арагнізавалі канцэрт вядучых польскіх выканаўцаў, якія граюць у стылі “фрыстайл”. У клюбе “Знойдзены аб’ект“, што ў самім цэнтры Варшавы, а 21-й гадзіне паводле менскага часу выступяць гурты “Proceente”, “Muflon”, “Flint”. Музыкі ў часе выступаў будуць сьпяваць імправізаваныя тэксты на тэму свабоды і дэмакратыі ў Беларусі.
Апоўначы на пляцы Пілсудзкага ўдзельнікі канцэрту выпусьцяць у паветра бел-чырвона-белыя балёнікі.
