Лінкі ўнівэрсальнага доступу

У турме на вуліцы Акрэсьціна застаюцца 29 апазыцыянэраў. Яшчэ некалькі чалавек адбываюць прэвэнтыўныя арышты ў рэгіёнах.


Усім арыштаваным перадалі цёплыя рэчы, напоі і туалетныя прыналежнасьці. Адзін з арыштаваных, хлопец, які 25 сакавіка ішоў дадому, выпадкова трапіў пад “зачыстку”. Ён адседзеў трое сутак і выйшаў на волю.

У Гомельскім ізалятары маладафронтавец Андрэй Цянюта трымае галадоўку на знак пратэсту супраць незаконнага арышту. Ён патэлефанаваў Паўлу Севярынцу з турмы. Павал пацікавіўся ягоным станам здароўя:

“Адчувае сябе добра. Усё яму перадаюць. Сядзіць у адной камэры з кіраўніком аргкамітэту Беларускай хрысьціянскай дэмакратыі па Гомелю Кастусём Жукоўскім. Па голасе, канешне, адчувалася, што такая паслуга, такі сэрвіс дзівіць яго й самога”.

Штодня каля турэмнай брамы турмы на вуліцы Акрэсьціна чарга, каб перадаць перадачу. Наста Палажанка паведаміла “Свабодзе”, што кожны арыштаваны атрымаў тое, што яму перадалі з волі.

“Цяпер забароненая ежа, нейкія такія смачныя рэчы, нават цукар. Дазволена толькі 2 літры соку на чалавека. Сапраўды, усё робіцца для таго, каб чалавеку было там непрыемна і няўтульна”.

Н.Ясевіч: “Ці можна міністру... лухту падсоўваць?!”

30 сакавіка на волю выйдуць маладафронтаўцы Валер Мацкевіч, Кася Салаўёва і Зьміцер Ясевіч. Маці Зьмітра, калі ўбачыла, што ў аўтобус кінулі яе сына, папрасіла, каб яе таксама туды пусьцілі. Жанчына мела пры сабе грошы, якія яна мусіла заплаціць за сылікатныя блёкі для будаўніцтва дома.

У сумцы былі сем пачак па мільёну рублёў і яшчэ адна, у якой не хапала некалькі купюраў да мільёну, бо, як патлумачыла Натальля Ясевіч, яна іх пазычыла сваім знаёмым.

Натальля апавяла:
Я патлумачыла: калі ласка, правярайце. Набярыце “Забудову” і спытайце, калі ёй трэба выкупіць блёкі. 4 чысла мне неабходна выкупіць гэтыя блёкі.


“Я патлумачыла: калі ласка, правярайце. Набярыце “Забудову” і спытайце, калі ёй трэба выкупіць блёкі. 4 чысла мне неабходна выкупіць гэтыя блёкі”.

У турму запрасілі тэлевізійную групу БТ. Апэратар здымаў раскладзеныя на стале грошы.

“Ён здымае, а потым заходзіць жанчына, мікрафон да мяне і запытвае: Гэта вашы грошы?”. Кажу: “Так. Гэта мае заробленыя грошы”. Тады яна кажа: “Гэта, відаць, грошы, якія прызначаліся для апазыцыі?”. Кажу: “Як вы, наагул, так можаце?! Як ня сорамна вам?!”. Я разьвярнулася, выйшла з пакою і пайшла па калідору. Калі дайшла да канцы калідора, азірнулася і ўбачыла, што чалавек, які здымаў, ішоў за мной і здымаў мяне”.

28 сакавіка міністар ўнутраных спраў Уладзімер Навумаў пад час прэсавай канфэрэнцыі заявіў, што міліцыянты затрымалі 25 сакавіка “жанчыну-касірку”, якая, цытую, “намагалася патлумачыць, што прыйшла на мітынг з грашыма, каб зрабіць пакупкі на наступны дзень, але грошы былі раскладзеныя па 100 тысяч, што яўна ўказвае на тое, для якіх мэтаў яны прызначаліся”.

Гаворыць Натальля Ясевіч:

“Ці можна міністру, на такім высокім узроўні такую лухту падсоўваць?! Гэта папросту неверагодна, гэта папросту ганебна... Як так можна?! Як можна?!”

30 сакавіка апроч Касі Салаўёвай, Зьмітра Ясевіча і Валера Мацкевіча на волю выйдуць Аляксей Паўловіч, Юры Макарэвіч, Алесь Лапіцкі і Андрэй Вінакураў.

4 красавіка на волю выйдуць арыштаваныя на 10 сутак апазыцыянэры, сярод якіх Яўген Афнагель, Алесь Ванчук, Максім Вінярскі, Зьміцер Курза, Ігар Панфілаў ды іншыя.

Ваша меркаваньне

Паказаць камэнтары

XS
SM
MD
LG