Лінкі ўнівэрсальнага доступу

Літоўскі парлямэнтар напіша беларускую дыктоўку

  • Тацяна Поклад

У Вільні агульнанацыянальная дыктоўка адбудзецца 21 сакавіка


Яе арганізуюць студэнты Эўрапейскага гуманітарнага унівэрсытэту. Запрашэньні разасланыя студэнтам, пэдагогам, віленскім беларусам, парлямэнтарам і грамадзкім дзеячам Літвы, якія ведаюць беларускую мову.

Разам са студэнтамі дыктоўку будуць пісаць выкладчыкі Эўрапейскага гуманітарнага ўнівэрсытэту, Віленскага пэдунівэрсытэту, беларускія настаўнікі зь Вільні, а таксма грамадзкія дзеячы і палітыкі. Запрашэньні дасланыя і ў амбасаду Рэспублікі Беларусь у Вільні.

У літоўскі Сойм парлямэнтарам, якія маюць беларускае паходжаньне, таксама дасланыя запрашэньні. Дэпутат Вацлаў Станкевіч паведаміў радыё “Свабода”, што падтрымлівае ідэю правядзеньня нацыянальнай дыктоўкі ў Вільні і прыедзе напісаць дыктоўку разам з усімі удзельнікамі ў аўдыторыі ЭГУ.

Пісаць дыктоўку будзе і заснавальнік “Талакі” Сяржук Вітушка, які жыве ў Вільні і працягвае актыўную грамадзкую дзейнасьць, ня гледзячы на тое, што страціў зрок у выніку цяжкай хваробы. Сяржук Вітушка будзе пісаць дыктоўку на кампутары “усьляпую”.

Першая агульнанацыянальная беларуская дыктоўка праводзіцца з нагоды сёлетняга 90-гадовага юбілею БНР. Гэта прапанова Таварыства Беларускай Мовы імя Францішка Скарыны, Міжнароднай фэдэрацыі правоў чалавека, Беларускага ПЭН-цэнтру, Беларускай асацыяцыі журналістаў, Згуртаваньня беларусаў сьвету “Бацькаўшчына”, Саюзу пісьменьнікаў Беларусі ды іншых арганізацыяў, партыяў, грамадзкіх, культурных дзеячоў Беларусі. Ініцыятар акцыі – Уладзімер Падгол.

Аргкамітэт вырашыў правесьці першую агульнанацыянальную дыктоўку ў Беларусі 23 сакавіка. Правяраць тэксты дыктовак будуць прафэсійныя выкладчыкі беларускай мовы. 25 сакавіка вынікі агульнанацыянальнай дыктоўкі будуць агучаныя незалежнымі СМІ.

Нацыянальныя дыктоўкі ўжо праводзіліся такімі краінамі, як Літва, Польшча, Францыя.
XS
SM
MD
LG