Пры гэтым у пастанове сойму гаворыцца, што партыя возьме ўдзел у вызначэньні адзінага кандыдата "толькі ў выпадку, калі рашэньне аб працэдуры вызначэньня адзінага кандыдата будзе прымацца кансэнсусам усіх суб'ектаў, якія вылучаюць сваіх прэтэндэнтаў на пасаду адзінага кандыдата ад Аб’яднаных дэмакратычных сіл".
Намесьнік старшыні БНФ Алесь Міхалевіч і сябра БНФ Юры Хадыка ўжо заявілі пра сваю гатоўнасьць быць кандыдатамі на прэзыдэнта ад партыі. У інтэрвію Свабодзе Міхалевіч сказаў:
“Партыя БНФ зрабіла пэўныя высновы з кампаніяў 2001 і 2006 гадоў. У 2001 годзе партыя без усялякіх умоваў, без падпісаньня пагадненьня падтрымала Сямёна Домаша, ў 2006 годзе партыя падтрымала Аляксандра Мілінкевіча. На думку часткі кіраўніцтва БНФ, трэба зрабіць усё магчымае, каб перамоўныя пазыцыі партыі былі максымальна добрымі. Для гэтага трэба мець свайго кандыдата, з чым я згодны таксама. Але маё асабістае меркаваньне, што Мілінкевіч адпавядае тым патрабаваньням, якія партыя БНФ вылучала і вылучае. Ён ідэйна блізкі да нашай партыі. Каб на наступных выбарах змагацца за рэальную ўладу, а не вылучаць тэхнічнага кандыдата, трэба вылучаць таго, хто ўжо вядомы і папулярны.
Маё асабістае вылучэньне мае на мэце, каб калі не на бліжэйшыя выбары, то праз адны выбары партыя мела пазнавальнага кандыдата і магла рэальна змагацца за ўладу”.
