Лінкі ўнівэрсальнага доступу

Пяць сутак арышту за ўлётку


Судзьдзя Цэнтральнага суду Менску арыштавала на пяць сутак моладзевага актывіста Максіма Сергяйца за распаўсюд улётак з надпісам: ” БНР-90, 25 сакавіка, плошча Якуба Коласа, 18.00”.


Сьведкамі ў справе выступілі два міліцыянты. Міліцыянт Мікалай Янушкевіч апавёў, што ў тралейбусе № 12 ён заўважыў, як 22-гадовы Максім Сергяец наклейваў налепку, і выклікаў падмогу.

Другі міліцыянт, Вадзім Губар, цьвердзіць, што пры затрыманьні і вобшуку з-пад курткі хлопца выпалі яшчэ тры налепкі. На Максіма склалі пратакол за парушэньне парадку правядзеньня масавых акцый. Да суду хлопца трымалі пад вартай.

Максім сказаў у судзе, што ўсяго толькі разглядаў налепку. Судзьдзя Тацяна Паўлючук прызнала хлопца вінаватым у парушэньні вызначанага парадку правядзеньня масавых акцый і пакарала яго арыштам на пяць сутак.

Разам з Максімам Сергяйцом былі затрыманыя моладзевы актывіст Аляксей Шлома і сябра “Маладых дэмакратаў” Віталь Стажараў. Іх міліцыянты адпусьцілі, не складаючы пратаколаў. Віталь Стажараў сьцьвярджае, што міліцыянты білі Максіма Сергяйца:

“Яго білі, і ён прасіў, каб яму выклікалі “хуткую”, ён казаў, што яму дрэнна і ў яго баліць сэрца. Ніхто ня выклікаў, яго білі і загадвалі стаць тварам да сьцяны”.

Міліцыянты адабралі ў актывістаў “для праверкі” раздрукаваныя артыкулы з інтэрнэту і лісты з подпісамі грамадзянаў за далучэньне Беларусі да Эўразьвязу.

Аляксей Шлома згадвае, што калі міліцыянт зайшоў у тралейбус, там ужо вісела некалькі налепак:

“Да яго падышоў чалавек, які сядзеў насупраць нас, і сказаў, што гэта мы наляпілі. Міліцыянт выклікаў нарад, нас на наступным прыпынку вывелі, але ў нас яны нічога не знайшлі. А ў Максіма было некалькі налепак. Нас прывялі ў Цэнтральны РУУС. Урэшце знайшлі кабінэт, куды нас адвесьці, і там без усялякіх пратаколаў, нічога не пытаючыся, да Сергяйца падышоў міліцыянт. Ні званьня, ні імя не сказаў свайго, і пачаў яго зьбіваць. Потым паставіў да сьцяны і па нагах, у грудзі біў. Нас трымалі недзе дзьве гадзіны. Яго пакінулі там, а нас зь Віталікам адпусьцілі. Нам сказалі, каб мы не зьяўляліся на суд, нікуды, бо трапім усьлед за Максімам”.


Улёткі, за якія М.Сергяец атрымаў пяць сутак

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG