Лінкі ўнівэрсальнага доступу

Начальнік калёніі яшчэ не прыняў канчатковага рашэньня


Начальнік калёніі "Віцьба-3" Віталь Агнісьцікаў сказаў, што яшчэ не прыняў рашэньня адносна водпуску Аляксандра Казуліна.


Ён адмовіўся прыняць журналістаў і праваабаронцаў, а ўсе пытаньні наведнікі задавалі яму ў калідоры на хаду.

Прысутныя пасьпелі даведацца, што А.Казулін адчувае сябе здавальняюча, што да стану здароўя. Начальнік калёніі цьвердзіць, што яшчэ не атрымліваў заявы наконт галадоўкі палітвязьня.

З усімі астатнімі пытаньнямі Віталь Агнісьцікаў сказаў зьвяртацца ў прэсавы цэнтар Міністэрства ўнутраных справаў.

Праваабаронца Леанід Сьвецік папрасіў перадаць палітвязьню друкаваныя матэрыялы пра сытуацыю вакол сям’і Казуліных і спачуваньні, якія выказваюць людзі. В. Агнісьцікаў паабяцаў перадаць іх Казуліну, але невядома ці пройдуць гэтыя матэрыялы цэнзуру.

Кіраўнік прэсавай службы МУС Алег Сьлепчанка сказаў, што яму невядома пра рашэньне адносна водпуску А.Казуліну для пахаваньня жонкі.

* * *
Крымінальна-выканаўчы кодэкс Рэспублікі Беларусь

Артыкул 92. Выезды асуджаных да пазбаўленьня волі за межы папраўчых установаў:

1. Асуджаным да пазбаўленьня волі, якія ўтрымліваюцца ў папраўчых калёніях для асобаў, што ўпершыню адбываюць пакараньне ў выглядзе пазбаўленьня волі, і прапраўчых калёніях для асобаў, што раней адбывалі пакараньне ў выглядзе пазбаўленьня волі, ва ўмовах агульнага рэжыму, папраўчых калёніях-пасяленьнях і выхаваўчых калёніях, а таксама асуджаным, пакінутым ва ўстаноўленым парадку ў сьледчых ізалятарах для выкананьня работ па гаспадарчым абслугоўваньні, могуць быць дазволеныя кароткатэрміновыя выезды за межы папраўчых і выхаваўчых установаў працягласьцю да сямі сутак, ня лічачы часу, неабходнага для праезду туды і назад, у сувязі з выключнымі абставінамі, пазначанымі ў частцы пятай артыкулу 59 гэтага Кодэксу, а таксама для папярэдняга вырашэньня пытаньняў працоўнага і бытавога ўладкаваньня пасьля вызваленьня.

6. Дазвол на кароткатэрміновы выезд даецца начальнікам папраўчай установы па ўзгадненьні з пракурорам з улікам характару і цяжкасьці зробленага злачынства, асобы і паводзінаў асуджанага.

Артыкул 59. Парадак і ўмовы выкананьня пакараньня ў выглядзе арышту:

5. Пры выключных абставінах (сьмерць ці цяжкая хвароба блізкага родзіча, якая пагражае яго жыцьцю, стыхійнае бедзтва, якое нанесла вялікую матэрыяльную шкоду асуджанаму ці яго сям'і) асуджаным да арышту рашэньнем начальніка арыштнага дому можа быць дазволеная тэлефоная размова працягласьцю да 15 хвілінаў з блізкімі родзічамі з аплатай з уласных сродкаў асуджанага.
XS
SM
MD
LG