Лінкі ўнівэрсальнага доступу

Косаўскія альбанцы чакаюць прызнаньня абвешчанай напярэдадні ў Прышціне новай дзяржавы. Хутчэй за ўсё, сярод першых незалежнасьць Косава прызнаюць ЗША, Вялікая Брытанія, Нямеччына, Францыя і Італія. Адназначна нэгатыўна супраць абвяшчэньня косаўскай незалежнасьці выказаліся Расея і Кітай. Прэзыдэнт Сэрбіі Борыс Тадзіч заявіў, што ягоная краіна ніколі не прызнае незалежнасьці Косава.


Альбанцы складаюць 90 працэнтаў жыхарства Косава. Астатнія косаўскія насельнікі – гэта пераважна сэрбы: сэрбскае насельніцтва колькасна дамінуе на поўначы і ў адным з паўднёвых раёнаў Косава.

У дэклярацыі аб незалежнасьці, абнародаванай косаўскім прэм’ер-міністрам Хашымам Тачы, Косава абвешчана незалежнай дзяржаваю, дзе шануюцца правы ўсіх этнічных супольнасьцяў.

На дэклярацыю косаўскіх альбанцаў катэгарычна нэгатыўна адрэагавала Сэрбія.

Прэзыдэнт Сэрбіі Борыс Тадзіч
“Сэрбія зробіць усё магчымае, каб ануляваць аднабаковае і незаконнае абвяшчэньне незалежнасьці. Сэрбія ніколі не прызнае незалежнасьці Косава”, – заявіў сэрбскі прэзыдэнт Борыс Тадзіч.

Бялград пагражае ўжыць у адносінах да Косава эканамічныя і палітычныя санкцыі, аднак выключае выкарыстаньне вайсковай сілы.

Замежным амбасадарам у Бялградзе паведамлена, што Сэрбія зьнізіць ровень дыпляматычных адносінаў з усімі дзяржавамі, якія пойдуць на прызнаньне незалежнасьці Косава.

Тым часам косаўскія лідэры зьвярнуліся сёньня да 192 краінаў сьвету з просьбаю прызнаць незалежнасьць.

Дж.Буш: "Касавары цяпер незалежныя...”
“Касавары цяпер незалежныя”, – адзначыў, камэнтуючы сытуацыю, прэзыдэнт ЗША Джордж Буш. Чакаецца, што менавіта ЗША і краіны Эўразьвязу будуць сярод першых, хто прызнае незалежнасьць Косава.

Пры гэтым сярод краінаў Эўрапейскага Зьвязу, які назіральнікі называюць “хросным бацькам” косаўскай незалежнасьці, ёсьць шэраг краінаў, скептычна настроеных у пытаньня прызнаньня незалежнага Косава.

Дзьмітры Рупель
Дзьмітры Рупель, міністар замежных справаў Славеніі, якая старышынюе цяпер у Эўразьвязе, заявіў, што кожная зь дзяржаваў будзе рабіць свой уласны выбар:

“Краіны Эўразьвязу вольныя рабіць тое, што палічаць за патрэбнае. Прызнаньне Косава – гэта не пытаньне для Эўразьвязу ў цэлым. Кожная зь дзяржаваў будзе вырашаць у залежнасьці ад сваіх паглядаў і перакананьняў. Вядома, я разумею, што многія краіны Эўразьвязу прызнаюць Косава”.

  • 16x9 Image

    Юрась Бушлякоў

    Нарадзіўся у 1973 годзе ў Менску. Беларускі мовазнаўца. Кандыдат філялягічных навук. Ад пачатку 2000-х гг. супрацоўнік Беларускае службы Радыё Свабода.

XS
SM
MD
LG