«За апошні тыдзень у нашай камандзе мы мелі пяць выпадкаў, калі ў дачыненьні да сваякоў чальцоў „Народнага антыкрызіснага ўпраўленьня“ былі спробы шантажу, ціску, іншых спосабаў незаконных дзеяньняў для таго, каб паўплываць на нашу працу», — заявіў Павал Латушка ў інтэрвію ўкраінскаму журналісту Васілю Галаванаву, заўважыла выданьне «Позірк».
Павал Латушка назваў рэпрэсіі супраць сваякоў сябраў НАУ праявай «сталінізму».
«Гэта сталінізм, гэта ўвядзеньне формулы „сябра сям’і ворага народа“. І толькі на падставе роднасных сувязяў чалавека можна будзе рэпрэсаваць: турма, звальненьне, ціск, затрыманьні, допыты. Гэта ўжо мае месца быць, але ён хоча гэта маштабаваць», — заявіў Павал Латушка.
- 25 красавіка на пасяджэньні Ўсебеларускага народнага сходу Аляксандар Лукашэнка прыгразіў беларусам, якія выехалі за мяжу і «выношваюць пляны супраць Беларусі», рэпрэсіямі супраць іхных сваякоў, а таксама пазбаўленьнем іх уласнасьці. «Не забывайце, што вы вельмі моцна шкодзіце сваім сваякам. Не забывайце, што ў вас нейкая ўласнасьць ёсьць тут (у Беларусі. — рэд.), раю ўжо забыцца пра гэтую ўласнасьць. Але ня стаўце пад удар сваіх сваякоў», — заявіў Лукашэнка.
- З 2020 году зь Беларусі з прычыны палітычных рэпрэсіяў, паводле розных ацэнак, зьехалі ад 350 да 500 тысяч чалавек. І ў 2024 годзе правы чалавека ў Беларусі па-ранейшаму парушаюцца, асноўныя свабоды знаходзяцца ў крытычна ўразьлівым становішчы, бесперапынна адбываюцца рэпрэсіі ў дачыненьні да палітычных супернікаў рэжыму і іншадумцаў, адзначаюць праваабронцы «Вясны».
- Па стане на 25 красавіка, у Беларусі ў месцах пазбаўленьня волі знаходзяцца 1398 палітвязьняў, афіцыйна прызнаных такімі праваабарончай супольнасьцю. Акрамя таго, па стане на канец сакавіка сама меней 1 680 палітвязьняў ужо выйшлі зь месцаў зьняволеньня. Рэальная колькасьць палітвязьняў у Беларусі можа быць большай, адзначаюць праваабаронцы.
- Палітычных апанэнтаў рэжыму, якія знаходзяцца за мяжой, у Беларусі пачалі судзіць завочна ў рамках так званага «спэцыяльнага вядзеньня». Менавіта гэткім чынам, сярод іншых, асудзілі палітыкаў Сьвятлану Ціханоўскую (15 гадоў калёніі агульнага рэжыму) і Паўла Латушку (18 гадоў узмоцненага рэжыму), а таксама блогераў Сьцяпана Пуцілу (29 гадоў узмоцненага рэжыму) і Яна Рудзіка (19 гадоў узмоцненага рэжыму) і інш.
- Таксама вядомыя выпадкі, калі праціўнікаў рэжыму Лукашэнкі, якія знаходзяцца за мяжой або ў зьняволеньні, канфіскоўвалі іх маёмасьць у Беларусі, а пасьля прадавалі з аўкцыёнаў.
Форум